Yeh Dosti hum nahin thodenge

මේ මිතුදම කිසිදිනෙක බිඳ නොගන්නෙමි
සියළු වෙර සිඳී ගියද ඔබව හැර නොයමි

ඔබේ ජය මගේද ජයයි
ඔබ පරදී නම් මාද පරදී
ඇසුනේද මිතුර

ඔබේ දුක මගේද දුකයි මගේ පන ඔබේද පන වේ
එවැනිය අපේ මිතුදම

ඔබ වෙනුවෙන් දිවි පරදුවට තබා
ඕනෑම දෙයක් කරමි
ඔබ වෙනුවෙන් ඕනෑම කෙනෙකුගේ
සතුරෙකු බවටද පත්වෙමි

ලෝකයා දුටු විට දෙදෙනෙකු දකී
එහෙත් අප සැබවින්ම දෙදෙනෙකු නොවේ
තරහ මරහ නිසා අප වෙන්වේද
අහෝ දෙවියනි එසේ නොවන්න

කන්නෙ බොන්නෙ එකටය
දිවි ඇතිතුරා මැරෙන තෙක් ඉන්නෙත් එකටමය

Yaad Kiya Dil ne

හදවත ඔබව සිහිපත් කරයි
ඔබ කොහිද
වසන්තය නැලවෙයි
ඔබ කොහිද
ඔබ කොතැන සිටියත්
මට ආදරයෙන් අමතන්න

අද ඔබ නිමග්නව සිටින්නේ කවර කල්පනාවකද
මහද උදව්වක් නැතිව අසරණව ඇත
මේ කුරිරු ලොව ඔබ පමණි මට සැනසුම
හදවත ඔබව සිහිපත් කරයි

රැයද ගෙවී උදෑසනද එළඹෙයි
ඔබ ගැන කල්පනාවෙන් මම නිනව් නැතිවීමි
දැන් මගේ මුළු ජීවිත කතාවම ඔබය
හදවත ඔබව සිහිපත් කරයි

ඔබ මගේ දිවියේ කොටසක් වී ඇත
ඔබ මගේ දිවි මගේ පහනය
ඔබ මගේ ලොව අහස් කුස වැනිය
හදවත ඔබව සිහිපත් කරයි

Aake Seedhi Lagi Dil Pe

සෑම වයසකම සෑම රටකම වැසියෙකුට රස විඳිය හැකි මෙම ගීතයේ විශේෂත්වයක් ඇත. මෙය ප‍්‍රහසනය රැගත් විනෝදවත් යුග ගීතයක් වන අතර ගීතය සඳහා ගැහැණූ වෙස්ගෙන රඟපානුයේ කිශෝර් කුමාර්ය. එහෙත් ඔහු පෙම්වතාට පසුබිම් ගායනය කරන්නට තිබූ අතර ගීතයේ ඔහු රඟපෑ ගෑණු චරිතයට පසුබිම් ගායනය කරන්නට තිබුණේ ලතා මංගේෂ්කාර්ටය.

ශබ්දාගාරයේ පටිගත කරන දිනයේ ලතාමංගේෂ්කාර් පැමිණිමට නොහැකි බව දන්වා සිටි අතර ගයන්නට ගායිකාවක් සොයමින් සිටින විට සංගීත අධ්‍යක්ෂක වෙත කිශෝර් කුමාර් දන්වා සිටියේ තමාම එයද ගයන බවය. දැන් මෙන් කඩින් කඩ නොව එක දිගටම ගායකයාගේ කොටසත් ගායිකාවගේ කොටසත් ගයමින් කිශෝර් කුමාර් මෙහි යුග ගායනයම තනිව සිදුකොට ඇති ආකාරය ඉතා විශිෂ්ඨය.

ගැ- අහෝ ඔබගේ කටාක්ෂ නිරීක්ෂණය
කැපෙන පිහියක් මෙන් කෙලින්ම හදවතට පිවිසුනි
පි- ඔබේ දඩබ්බර බැල්ම මගේ හදවත සොරාගෙන ගියේය

ගැ-හදෙහි රැහැන්පට සිඳබිඳිමින්
මගේ වීදියට නිතර එන්නේ ඇයිද?

පි-මොනව කරන්නද සුන්දරියේ මම ආදරේ ඔබට නොවැ
ඔබ නොදැක මගේ සිතට සැනසිල්ලක් නැහැ

ගැ-අනේ යන්න මා මෝඩයෙකු නොකරන්න
නැහැදිච්ච පෙම්වතා

ගැ- හදවත සොරකම් කරන්නට හොරෙන් හොරෙන්
මගෙ පස්සෙන්ම එන්නෙ ඇයි?
කියන දේ ඇහුවෙ නැත්නම් මම කෑ ගහනව ඔන්න
‘‘ අනේ මාව බේරගන්න මෙන්න වනචරයෙක්, කුකුලෙක්’’

පි- පළමුව ඔබේ දෑසින් මාව ඇද බැඳගෙන
දැන් මට කියනව පස්සෙන් එන්න එපාලූ

ගැ- ඔබේ දෑස, සුමිහිරි වදන්
අහෝ මා උමතුවට පත් කරන ලදි

චිත‍්‍රපටය- හාෆ් ටිකට්
වර්ෂය- 1962
යුග ගායනය- කිශෝර් කුමාර්
සංගීතය- සලීල් චෞද්රි
රංගනය- ප‍්‍රාන් සහ කිශෝර් කුමාර්

Tum Na Jane Kis Jahaan Mein Kho Gaye

ලොව කොතැන ඔබ සැඟව ගියේදැයි නොදනිමි
මෙතරම් විශාල ලෝකයේ මම අද තනිවී හිඳිමි

මරණය පවා ළඟා නොවෙයි
ඔබ දැක්මෙහි ආසාවද ඉවත නොයයි
හදවතට කුමක්ද මේ සිදුවුණේ
කිසිදු දෙයකින් සතුටක් ඇති නොවෙයි
මගේ සියල්ල සොරාගෙන
ඔබ සැඟව ගියේ කොහිද
ඔබ කොහිද ඔබ කොහිද

එක් ජීවිතයට දහස් ගණන් වේදනාවන්
කොහොම දරාගෙන ජීවත් වන්නද
එක් වතාවක් යලි ආවොත්
ඔබේ දෑස දැක මියෙන්නට හැකිය
මගේ සියල්ල සොරාගෙන
ඔබ සැඟව ගියේ කොහිද
ඔබ කොහිද ඔබ කොහිද

	Old is Gold - Tum Na Jane Kis Jahan Mein Kho Gaye/lata(sazaa) .mp3
	Found at bee mp3 search engine

Ye daulat bhi le lo

වැඩිවියට පත්වූ පසු ජීවිතයේ බැඳීම් සහ වගකීම් නිසා පීඩාවට පත්ව ගතකරන ජීවිතයේ එකිනෙකා අතර ඇතිවන ගැටළු අභිමුවේ අතීතයේ ළමාවියේ මේ කිසිදු බරක් නැති කල අප ගෙවූ දිවියේ මිහිරියාව ගැන සිහිපත්වී ඒ ගැන අපූරුවට ලියැවුණු ගීතයකි මේ.

මේ ධනයද මේ නම්බුවද ඔබ ගෙන යන්න
මගේ යව්වනයද මගෙන් රැගෙන යන්න
එහෙත් මට ආයෙත් දෙන්න මගේ ළමාවියේ
මෝසම් වැස්ස
කඩදාසි බෝට්ටු සහ ගලා හැලූන වැසි දිය......

අතීතයේ වැළලී ගිය බොහෝ දේ
අත්තම්මාගෙන් අසා දැනගතිමි
ඒ අපේ පුරාණය
ඒ කතාවල කියැවිණි සුන්දර කිඳුරියන් ගැන
රැයද කෙටි කරමින්
දිගට ඇදෙන කතන්දර
කොහොම අමතක කරන්නද ඒ සුන්දර ළමාවිය?

නිවෙසින් කිසිවක් රැගෙන දුවන්නට
ගිනි අව්වේ වේලෙමින් බලා සිටියෙමි
බට්ටිත්තන් සමණලයන් කෝකිලයන් අල්ලන්නට දිව ගියෙමි
බෝනික්කන් විවාහ කරවන්නට ගොස් ගුටි බැට ඇණ ගතිමි
ඔන්චිල්ලාවෙන් ලිස්සා වැටී හඬමින් නැවත සැනසුනෙමි
ගස්කොල වලින් තැනූ මාළ වළලූ තෝඩුවලට
මම බොහෝ ඇළුම් කලෙමි
බිඳුණු වීදුරු වළලූ මට අතීතයම සිහිපත් කරයි

ලන්දට බඩවැටියට දුවගියෙමි
වැලිවලින් මාළිගා තනා බිඳ දැමුවෙමි
අහිංසක බලාපොරොත්තුවල සේයාවන්
මගේ මහා ධනය බෝනික්කන් සහ සුන්දර සිහින විය
ලෝකයෙන් පීඩාවක් නොවීය
බැඳීමෙන් වේදනාවක් නොවීය
ඒ මගේ ළමාවිය කොයි තරම් සුන්දරද

Main Kya Karoon Ram

මොනවා කරන්නද දෙයියනේ
මට ලැබුණේ මහල්ලෙක්

මම සුන්දර බෝනික්කියක් වෙමි
මගේ ගමන මොණරකිරිල්ලියකගේ මෙනි
ඔහුගේ හිසකේ සීයාගේ මෙන්ම සුදුපැහැවී ඇත
හැමදේම වැරදී ගියේය මට ලැබුණේ මහල්ලෙකි

සියළු දෙන මල් උයනට ගියහ
සියල්ලෝම මල් නෙලාගෙන පැමිණියහ
මගේ මහල්ලා මට මල්ගෝවාගෙඩියක් උස්සාගෙන පැමිණියේය
මගේ නමද කැත විය අහෝ මට ලැබුණේ මහල්ලෙකි

මහල්ලා මාව රැගෙන කිදුරු දූවකට ආවෙය
මම අවට බලන්නට පර්දාව එසවීමි
මහල්ලාට ඉන් කේන්ති ගියේය
අපොයි තවත් මොනවා වන්නද අවසානයේ මට ලැබුණේ මහල්ලෙකි

Jaayen to jaayen kahan

යනවයි කියල කොහේ කියල යන්නද?
කවුරුත් වටහාගනීද දුකින් පිරි
මගේ හදවත පවසන දෙය

දිවිය අකමැති සියල්ලෙහි එකතුවකි
වෙන මොනවාද?
රුධිරයෙහි වේදනාව
හදවතට ගොස් දුමාරයක්ව ඇත
යනවයි කියල කොහේ කියල යන්නද?

මගේ හදවත අන්‍යයන්ගේ දුකෙන්ද
මගේ දුකෙන්ද පිරී ඇත
ඉදින් මගේ හදවත බේරාගන්නට
බලාපොරොත්තුවක්ද නැත
එක කුඩා පහුරක් සමගින්
දහස් ගණනක් කුණාටුය
යනවයි කියල කොහේ කියල යන්නද?

ළයෙහි ගිනි හුස්මෙහි සුසුම් වැල්
කොහොම මම මේ ජීවිතය එක්ක
මේවා තෝරා බේරගන්නද?
මගේ සියළු හැගුමන් පවා වියලී ගොසිනි
යනවයි කියල කොහේ කියල යන්නද?

Aaj Bichde Hain

අද අපි වෙන්වෙමු
ඊයෙ හිතේ තිබුණු බයවත් අද නැත
ජීවිතය සිතන තරම් සරළද නැත

පෑරුණු හද ලොවට නොපෙනෙයි
නමුත් එය සිසිල් වන විට
වේදනාව පිටතට පැමිණෙයි
ලොවට සතුටින් සිටින බව පෙන්වනවිට
මුහුණ ඇතුලතින් මලානිකවී යයි

මොනවා කියන්නදැයි සිහියට නොඒ
එහෙත් විඳදරාගැනීමනම් ආශ්චර්යයකි
කවරෙක් වේදනාවට විසඳුමක් සොයත්ද
ලෝකයම කරන්නේ ප්‍රශ්ණ ඇසීම පමණකි

හෙට එළිවන විට මොනවා කරන්නදැයි නොතේරේ
ගෙවී ගිය පෙර දවස යලිත් නොපැමිණෙයි
කාලය නම් කපා දැමූ අතුවල
කවදාවත් ඵල හටගන්නේ නැත

රළු පොළව, හදවත්, මිනිසුන්
දැක්මද මහත් පීඩාවකි
කඳුළු පිස දැම්මත් කඳුළු ඇතිකල සළකුණු
වියැලී යන්නට බොහෝ කල්යයි

Nayak nahin khalnayak hei tu

ජීවිතය නම් නාටකය තුල එක් අයෙක් වීරයෙකු වෙද්දී තවත් අයෙකු දුෂ්ඨයෙකු බවට පත් වෙයි.

ඔබ වීරයා නොව දුෂ්ඨයාය
අන්‍යන්ට මහත් දුක් පමුණුවන්නෙකි

ආදරයට ඔබේ මොන ගරුත්වයක්ද?
ආදරය ලබන්නට ඔබට කවර හැකියාවක්ද?

ඔබ ආදරයට සුදුසු යැයි පෙණුනද
ඔබ ආදරයේ අවනම්බුවය
එක දිනෙකදී ඔබට එය අවබෝධ වනු ඇත
එහෙත් එදිනට ඔබ බොහෝ පමා වැඩිය

ඔබේ තරාතිරම ඔබ කෙදිනකවත් මැනගෙන නැත
ඔබ ඔබටම කෙදිනකවත් අවංක වී නැත
කෙතරම් ඔබ ජීවිතය හා සෙල්ලම් කලේද
අහෝ අවසානයේ ඔබ අන් අයගෙන් හුදකලාවී ඇත

Aa Laut Ke Aaja Mere Meet

නැවත හැරී එන්න
නැවත හැරී එන්න මගෙ සොඳුරිය
මගේ ගීතය ඔබට අඬගසයි
මගේ දිවිය ඔබ නැතිව සංගීතවත් නැත

අහසෙත් වැස්ස දෑසෙත් වැස්ස
හදවතෙහි මහා වේදනාවකි
සීතල සුළඟ මා වෙවුළුවයි
අහෝ සොඳුරිය දැන්වත්
මා ඉදිරියෙ පෙනී සිටින්න
කෙසේ ඔබ රැක සිටීද ආදරයේ පොරොන්දු
නැවත හැරී එන්න මගෙ සොඳුරිය
මගේ ගීතය ඔබට අඬගසයි


වරෙක සිනාව වරෙක වේදනාව
මේ කවර ජීවන ක්‍රීඩාවක්ද
මොහොතක හමුවීම මොහොතින් වෙන්ව යාම
දින දෙකක සැණකෙලියකි මේ දිවිය
මේ මොහොත ගෙවී යන්නට ඉඩ නොදෙන්න
මගේ ගීතය ඔබට අඬගසයි
නැවත හැරී එන්න මගෙ සොඳුරිය
මගේ ගීතය ඔබට අඬගසයි